दाङ । गुरुकुल एकेडेमी घोराही, गुरुकुल एकेडेमी तुलसिपुर र गुरुकुल एकेडेमी लमहीको संयुक्त आयोजनामा विद्यालयस्तरीय खेल सप्ताह–२०८२ भव्य रूपमा सुरु भएको छ। विद्यार्थीहरूमा खेलकुदप्रतिको रुचि अभिवृद्धि गर्ने, शारीरिक तथा मानसिक विकासमा योगदान पुर्याउने उद्देश्यले खेल सप्ताहको आयोजना गरिएको हो। खेल सप्ताहको उद्घाटन अवसरमा विद्यालय प्रशासन, शिक्षक, अभिभावक, विद्यार्थी तथा सञ्चारकर्मीहरूको उल्लेख्य उपस्थिति रहेको थियो। उद्घाटन कार्यक्रमपछि खेल सप्ताहको पहिलो दिन शिक्षक र पत्रकारबीच मैत्रीपूर्ण भलिबल प्रतियोगिता सम्पन्न गरिएको थियो, जसले कार्यक्रमलाई अझै रोमाञ्चक र उत्साहपूर्ण बनाएको थियो।
मैत्रीपूर्ण भलिबल प्रतियोगितामा शिक्षक टोली र पत्रकार टोलीबीच प्रतिस्पर्धा भएको थियो। निकै प्रतिस्पर्धात्मक र मनोरञ्जनात्मक खेलमा पत्रकार टोलीले शिक्षक टोलीलाई २५–१७, २५–२१ र २५–१९ को सोझो सेटमा पराजित गर्दै विजय हासिल गर्न सफल भयो। खेलभर दुवै टोलीले खेल भावना, अनुशासन र आपसी सद्भाव प्रदर्शन गरेका थिए। खेलपछि बोल्दै आयोजक पक्षले शिक्षक र पत्रकारबीचको मैत्रीपूर्ण खेलले विद्यालय, सञ्चार क्षेत्र र समुदायबीचको सम्बन्धलाई अझ सुदृढ बनाउने विश्वास व्यक्त गरे। साथै, खेलकुदले स्वस्थ जीवनशैली विकास गर्नुका साथै सहकार्य, अनुशासन र नेतृत्व क्षमताको विकासमा महत्वपूर्ण भूमिका खेल्ने बताइयो।
खेल सप्ताहअन्तर्गत भलिबल, फुटबल, दौड, ब्याडमिन्टन, कबड्डी, छात्र–छात्रा प्रतियोगिता तथा विभिन्न मनोरञ्जनात्मक खेलहरू सञ्चालन गरिने विद्यालय प्रशासनले जानकारी दिएको छ। खेल सप्ताहको समापन समारोहमा उत्कृष्ट खेलाडी तथा विजयी टोलीहरूलाई पुरस्कार तथा प्रमाणपत्र प्रदान गरिनेछ।
गुरुकुल एकेडेमीले हरेक वर्ष आयोजना गर्दै आएको यस्ता खेलकुद कार्यक्रमले विद्यार्थीहरूको सर्वाङ्गीण विकासमा उल्लेखनीय योगदान पुर्याउँदै आएको विद्यालयले जनाएको छ।
